Gunnar, babai i Jonathanit, reflekton mbi përpjekjet e tij të dëshpëruara për të krijuar afrimitet me birin e tij të dashur. Rrugëtimi i tyre - i afrimitetit, shkëputjes dhe afrimit nga e para - e lë Gunnarin të nemitur, veçanërisht teksa Jonathan-i vijon të zhytet gjithnjë e më thellë në një botë të ndikuar prej ndikuesve të mediave sociale dhe modeleve të dyshimta. Një gjë e tillë çon në një rrënim shkatërrimtar që trondit të gjithë familjen.

Si regjisor dokumentarësh, Gunnar-i ka filmuar familjen dhe të dashurit e tij për më shumë se 20 vjet, në një përpjekje të sinqertë për të kuptuar veten dhe lidhjen e tij me të tjerët. Duke u rritur pa praninë e një babai, Gunnar-i u la ta gjente dhe të endej vetë në rrugëtimin e atësisë, duke u mbështetur në idealet e vjetruara të mashkulloritetit. Pavarësisht mënyrave të tij të ngathëta dhe që i përkisnin një shkolle të vjetër të së kaluarës, ai krijon një lidhje të thellë me të birin, Jonathan.

Megjithatë, Jonathan-i është një i ri me shpirt të lirë dhe i vendosur, dhe bëhet gjithnjë e më i distancuar. Gjithçka zbulohet në ditëlindjen e tij të 18-të. Jonathan-i zhduket për javë të tëra dhe rishfaqet në Brazil, në mënyrë tronditëse, i magjepsur nga një ndikues mashkull i mediave sociale me mbi 10 milionë ndjekës. Pikërisht kur Gunnar-i beson se ka arritur ta kuptojë të birin e tij, çoroditja thellohet më tej. Jonathan-in e tërheqin premtimet e ndikuesve të mediave sociale dhe ideologjive materialiste, të cilët ndjekin një rrugë të shpejtë drejt pasurimit. Duke e gjetur veten të kapur nga fryma e kohës në ndjekje të aspiratës së vet, si shumë të rinj të tjerë, Jonathani del rrezikshëm jashtë kontrollit. Kjo histori personale thellësisht e ndjerë për një at e bir që përpiqen të krijojnë afrimitet, e tejkalon mikrokozmosin e tyre, duke trajtuar temat universale të prindërimit, identitetit dhe trysnive e rreziqeve të një bote dixhitale. Ajo shqyrton rrymat gjithnjë e më subversive të kohës sonë, duke nxjerrë në pah çorientimin me të cilin përballen shumë prindër në kuptimin e botëve ku jetojnë fëmijët e tyre.

Përmes filmit Portret i një Ati të Mekur, Gunnar-i tregon një histori prekëse të afrimitetit dhe shkëputjes, mashkulloritetit dhe dashurisë pa kushte. I rrëfyer me zërin e tij të sinqertë dhe intim, filmi përzien humorin, gjallërinë, dëshpërimin dhe pikëllimin për të zbuluar të vërtetën pa dorashka të atësisë në epokën moderne.